经过刚刚作客击败奥沙辛拿，皇家马德里离西甲联赛封王只差4分。第2位同第4位嘅马德里体育会同西维尔，分数上已无法夺冠，而第3名嘅巴塞隆拿数字上反而仲有机会，如果佢哋赢哂之後西甲比赛，而皇马无法喺余下5场西甲拎到最少1胜1和或4和成绩，至有机会。

巴塞隆拿教练沙维访问时指球队仲未同西甲联赛讲byebye，都正常嘅，唔通呢个时刻话放弃咩？唔理人哋踢成点，只要皇马可以拎多4分就能夺冠，安察洛堤就会成为首个赢过5大联赛冠军嘅主帅。而且佢仲系首个横跨4个年代（1990-2020）都带领自己球队入欧联4强嘅教练。虽然佢换人方针依然令部份球迷不满，但皇马刚刚对奥沙辛拿（除咗加利夫巴尔出发前，再次不能上场，皇马无交代佢系不适定受伤。），佢起用好多後备球员，特别施巴约斯同洛迪高，表现亮丽。

无云尼仔（云尼斯素斯），洛迪高可以踢返佢擅长嘅左翼位置，睇到明显比之前踢右翼发挥得更好，走位同切入都顺畅，博到两个12码（可惜球王宾宴客），下半场後段只要佢一入禁区范围，奥沙辛拿就已经有几个球员「招呼佢」。

而施巴约斯老实讲，我系好少睇佢踢波。因为我冇睇开阿仙奴，而佢喺皇马又无乜上场。但噚日一睇，发现佢都几落力，制造咗几个机会之余，又积极参与进攻，绝对值得更多机会。另外，噚日30岁生日嘅伊斯高，虽然有一段时间无出，但都冇「雪到硬晒」，令球迷觉得佢值得续约。

皇马今季西甲可以领先10几分，除咗安察洛堤战术运用上出色，佢话有部署可以改变战局嘅球员之外。其实仲有系因为今年各球员都好fit，伤患减少咗，球迷真系要多谢呢一个功臣，就系皇马体能教练antonio pintus！

不过，欧联4强对曼城将好难打，特别系近几场上半场都好似踢得比较hea……（慢慢嚟，好似未上力，有时直情无咩攻势想控下球先咁），而过去10场只有2场零封对手，一对中坚默契亦未成形，比赛有无左闸都属未知之数，对曼城嘅进攻真系有好大弱点。皇马唔通真系要靠前面入多啲波嚟中和返个防守？情况真系令人担心。不过今日见皇马真系有可以改变战局嘅球员，今场又有机会踢一阵，希望唔会系俾曼城?住嚟打啦。

虽然好多球迷话，今季冇咩入货黎讲，皇马拎到西甲同入到欧联4强都算超额完成，但都行到嚟呢步，唔通真系唔想再入多次欧联决赛？做人老实啲好，我呢……，就好想球队可以行多两步喇。