皇家马德里提早夺得西甲冠军，我们找来皇家马德里香港球迷会会长June大谈爱队封王感受，她坦言，感觉犹如坐过山车。

问：对爱队封王有咩感想？

june：赢西甲当然好开心啦！印象中我睇皇家马德里咁耐，好似冇试过早咁多轮就夺冠，心情兴奋！夺冠後，有好好心情备战欧联4强次回合（对曼城）。我哋落後1球，但返到主场希望有力逆转，进入欧联决赛就更加好。

问：讲下封王关键战役？

june：我觉得系近排对西维尔（赢3:2）嗰场，都几深刻，因为一开始落後0:2，要洛迪高同埋拿祖追和，然而宾斯马补时阶段「反吸」，都几激动。点解我觉得咁关键？上季都因为对西维尔场波出现问题手球，有一边被判手球，有一边冇被判手球，施丹好嬲。嗰场我哋和咗波，冇咗两分之後失去赢西甲冠军主导权，最後一场要赢之余仲期望马德里体育和或者输，我哋至有得赢西甲，个故事最後大家都知，系马体会赢。今季咁样赢关键战役，好开心。

问：仲有咩难忘片段？

june：有啲似坐过山车。记得写过一啲关於安察洛堤嘅入球数，佢真系激活咗云尼素斯，令到佢同宾斯马好夹，头几场好多入球，大家都好开心好期待。至於点解讲过山车？球迷开始发现出嚟出去都系嗰班人，就怀疑佢哋开始有啲攰，少少跌watt，开始有啲危机，而前排有人又好似觉得安察洛堤麻麻地；然後去到依家几场大逆转，令我哋士气又增加返……好似又高又低嘅过山车，到星期六赢波，有好嘅收尾。

问：有咩封王功臣？

june：宾斯马就一定唔使讲，佢真系好出色同埋慢慢可以担起成队波。另外就系摩迪，呢两个都系关键角色。另一个少人提系古图奥斯，佢守住大门都好重要，咁仲有我哋嘅巴西孖宝啦……讲讲下讲成队。至於幕後功臣，心里都好多谢安察洛堤肯返嚟教皇马，因为当初都谂唔到有边个可以教。虽然都系嗰句，佢换人方针可能令大家好忟憎，但其实佢战术运用好出色，你见到今季有好多反胜，所以佢能够令球员沉得住气，打到逆境波，呢个系上季未必做到嘅事。另一个幕後功臣系体能教练antonio pintus，佢今季加入好多新嘅训练，例如我哋见到球员跑步时会戴啲特制口罩，应该系一啲氧气罩去做体能训练，令到球员伤患少咗好多。真系要多谢佢，令球员今季可以健健康康踢到尾。

问：球迷会有咩庆祝活动？

june：我记得两年前都答过呢个问题，因为疫情关系所以冇得庆祝。本来想搞睇波，而亦都因为疫情所以冇办法进行任何踢波活动。睇下有冇机会一齐食餐饭！噚晚，我哋都有约埋一齐开zoom睇波。之後几场波都好夜，所以未必再约到一齐睇。我哋下个月打算去捐血做慈善应援，大家都可以留意球迷会宣布，一齐支持。