皇家马德里一次，两次，三次，喺欧联淘汰赛总比数落後两球时大逆转反胜。除咗皇马战到最後嘅精神外，到底凭咩一次又一次对强队，都可以成功翻盘？

有球迷好想知点解、有球迷话系皇家马德里好彩、有球迷问可唔可以写一编关於佢哋嘅心理。咁今日就简单同大家分享少少睇法......

运动心理学家aidan moran 喺2012年提出，运动系靠身体配合，而赢波系靠心理。点解咁讲？喺2019年一项有关忍耐力极限嘅研究入面，发现令人停止，唔再努力嘅唔系肌肉疲劳，而系各种心理因素。

所以，系大脑主宰我地嘅身体极限，而唔系身体本身。

正如大家要凌晨5点出去做运动，精神上系需要好大推动力，出到去之後先系用气力。而当球队喺比赛最後几分钟仲落後两球时，仍然可以全队保持高度专注，除咗推动力，气力，亦系最讲求心理坚韧力（mental toughness）。

心理坚韧力（mental toughness）

教练同运动员要意识到心理坚韧力系一种心理结构，佢对於训练同比赛中取得成功系非常关键。简单讲，心理坚韧力有助球员於比赛压力下保持决心、专注同感知控制嘅一致性。

有呢种特质嘅人，佢有绝对相信自己有能力达成目标嘅自信，以及有从挫折中恢复过来嘅能力。

皇马传奇球员基斯坦奴朗拿度绝对系其中一个有超强心理坚韧力嘅球员，但今日想讲皇马现役球员同教练，却奥斯及安察洛堤，以下系一啲例子：

却奥斯（toni kroos）

却奥斯咁多年喺唔同嘅访问，或者佢弟弟都讲过，佢喺球场上，大至欧联或世界盃决赛前都唔会紧张；呢个唔系佢嘅个性，主要因为佢知道自己嘅能力，同知道自己可以喺重要时候发挥到最好，亦发现保持平静，喺好多场合都有好大帮助。

「成功经验亦都可以令我安心，佢令你意识到事情唔会再对你产生太大影响。」

「我都知道呢个只系一场足球比赛，有时唔会咁顺利。咁谂会令我觉得平静同放松。但我仍然会保持专注，因为我确实要关注我地嘅比赛情况。」但佢话球场外，佢嘅情绪都会被牵引。所以佢学识咗喺球场上运用佢嘅冷静同心理坚韧力。

安察洛堤

另外，教练安察洛堤亦都有超强心理坚韧力。各种访问入面，佢都表示好相信自己嘅球员同埋知道球队嘅能力，就算大家视皇马为underdog，佢都表示明白但亦已经有对应方案（可以改变战果嘅球员）。

佢喺对曼城赛前访问时表示，知道呢场比赛系一个挑战，但同时系一个机遇。佢亦提出要展现球员嘅个人能力，心态同个性都系重要嘅元素。比赛中，佢极少情绪起伏，无论大落後或者领先，佢都表现出冷静嘅一面。

赛後访问，安帅表示其实唔系太习惯咁大上落，但觉得加时嘅时间，自己球员心理质素更好。记者赞安帅好冷静，又问安帅有无一刻谂过已经输咗。佢好快咁答：无，无。佢话无时间谂，佢赞曼城控制到个比赛，但皇马把握到最後两个机会成为关键。

失咗一球，总比数落後两球，安帅换走卡斯米路同摩迪，换入卡马云加，阿辛斯奥，球迷都以为佢唔想赢。点知，安帅换入洛迪高、卡马云加、阿辛斯奥都系最後两球嘅关键人物。所以，心理坚韧力决定咗一个人点可以有效咁应对挑战、压力源同压力，无论佢身处喺咩情况。

最後，心理坚韧力其实系由4个组成部分组成，心理学家称为「4个 c」：

1. 遇到障碍及困难情况时感到事情於自我控制范围内（control）

2. 下定决心及坚持完成目标（commitment）

3. 对自身能力及人际交往能力的信心（confidence）

4. 视挑战为机遇（challenge）

对於运动员同教练嚟讲，拥有心理坚韧力令你比对手更有优势。除此之外，心理坚韧力可以令人能够更好咁管理压力，克服挑战，并於日常生活中有更好表现。呢一点，喺皇马球员同安察洛堤身上都完全展现。

下次再同大家讲吓，除咗呢份心理坚韧力之外，仲有咩因素可以令皇马球员咁淡定逆转劣势，而且状态比上年更提升。